[09.05.2008] 吴尊祸不单行三失手机

昨日吴尊与蔡卓妍在上海为新片《剑蝶》开工，吴尊继早前第三度遗失手提电话，之前拍戏时已埋口的伤口渗血等黑仔遭遇后，昨日开工又因落雨令拍摄受阻，吴尊堪称「新一代地狱黑仔王」。

整装待发的吴尊，本准备为马楚成导演新片开工，不过遇上大雨，众人只好在记者前大摆甫士，等待停雨，吴尊自爆黑仔遭遇说：「前几日唔见咗电话，好唔开心，不过冇亲密照，但有好多亲友电话，希望有心人执到畀番我，之前喺汶莱、台湾同内地都唔见过电话。而早前我手掌嘅伤口本好得七七八八，点知突然渗血，我唔系咁担心，反而同事仲紧张，至於亲身拍危险场面，系因为想学多啲嘢。（S.H.E嘅Ella话有段刻骨铭心恋情喎？）我知佢个情人系边个，我哋三个系好朋友。外间一时传我同张韶涵、Ella绯闻，一时传我同性恋，我都理唔到咁多咯！」

拍得开心

蔡卓妍（阿Sa）对同门师妹梁洛施传出已有未婚夫一事，她说：「我喺上海、泰国开工拍戏，冇乜留意香港新闻，唔好意思。拍呢套戏好开心，今日呢一身死靓仔打扮只系戏嘅初段，稍后我会变番女儿身，好开心可以拍得我好女仔嘅一面。今次全套戏都好有团队精神，而吴尊又好专业，不过我之前见佢手掌个伤口『标』血，好惊罗！」